KLAK – Icelandic Startups og Háskóli Íslands hafa endurnýjað samstarfssamning sinn til þriggja ára. Samningurinn eflir stuðning við nýsköpun innan háskólans og tryggir öllum nemendum HÍ aðgang að ráðgjöf starfsfólks KLAK án endurgjalds.
Samstarfið byggir á farsælu starfi undanfarinna ára. Ásta Sóllilja Guðmundsdóttir, framkvæmdastjóri KLAK, og Silja Bára R. Ómarsdóttir, rektor Háskóla Íslands, handsöluðu samninginn.
Fyrir nemendur sem vilja þróa viðskiptahugmynd eða kanna hvernig rannsóknir þeirra geta nýst í nýjum lausnum er ráðgjöfin stuðningur við að taka næstu skref. Þau geta leitað til starfsfólks KLAK og fengið leiðsögn við að þróa hugmyndir sínar áfram.
Starfsfólk KLAK mun jafnframt áfram heimsækja kennslustundir og viðburði við HÍ og miðla þekkingu á frumkvöðlastarfi og stofnun fyrirtækja. Þannig tengist stuðningurinn námi og starfi innan háskólans.
Samstarfið nær einnig til verkefna á borð við frumkvöðlakeppnina Gulleggið og vaxtarrýmið Dafna fyrir styrkþega Tækniþróunarsjóðs. Nemendur og starfsfólk HÍ hafa látið mikið að sér kveða í Gullegginu.
Með áframhaldandi samstarfi vinna KLAK og HÍ að því að fleiri hugmyndir verði að arðbærum sprotafyrirtækjum á vegum brautskráðra nemenda og að efla færni framtíðarstjórnenda.
English (UK) 
Íslenska