Versló sigrar Fyrirtækjasmiðju JA Iceland

Ungt frumkvöðlateymi úr Versló sigrar Fyrirtækjasmiðju JA Iceland með fræðandi borðspili

Fyrirtækið Þekktu landið! úr Verslunarskóla Íslands stóð uppi sem sigurvegari í Fyrirtækjasmiðju Ungra frumkvöðla – JA Iceland og var valið fyrirtæki ársins 2026. Verkefnið felst í fræðandi og skemmtilegu borðspili þar sem leikmenn keppast við að þekkja staðsetningar þekktra staða á Íslandi og læra um landið sitt í leiðinni.

Markmið spilsins er að sameina skemmtun og fræðslu og vekja forvitni um landafræði og menningu Íslands á lifandi og aðgengilegan hátt. Eigendur og stofnendur Þekktu landið! eru fimm nemendur í Verslunarskóla Íslands: Petra Björk Valdimarsdóttir, Thelma Kristbjörg Bæringsdóttir, Hera Björt Aðalsteinsdóttir, Tinna Björg Jóhannsdóttir og Hanna Falksdóttir Krüger.

Sterk nýsköpun úr íslenskum framhaldsskóla

Fyrirtækjasmiðja Ungra frumkvöðla – JA Iceland er öflugt frumkvöðlaferli fyrir framhaldsskólanema þar sem nemendur stofna, reka og loka eigin raunverulegu fyrirtæki yfir eina önn. Í ár tóku um 620 nemendur þátt og stofnuðu 150 fyrirtæki víðs vegar af landinu. Af þeim voru 40 fyrirtæki frá 17 framhaldsskólum valin í úrslit og kepptu um titil fyrirtækis ársins 2026 á uppskeruhátíð í höfuðstöðvum Arion banka.

Að þessu sinni var það Þekktu landið! sem stóð upp úr með skýra hugmynd, vandaða framkvæmd og sterka sýn á hvernig hægt er að nota leikjavæðingu til að auka þekkingu og tengsl við íslenskt samfélag og landslag.

Fulltrúar Íslands á stærstu nýsköpunarkeppni Evrópu

Með sigrinum í Fyrirtækjasmiðjunni mun Þekktu landið! keppa fyrir hönd Íslands á Evrópukeppni Ungra frumkvöðla, GEN_E 2026, sem fer fram í Riga í Lettlandi dagana 7.–10. júlí. Um 400.000 nemendur hófu keppni í yfir 40 Evrópulöndum og aðeins eitt lið er valið til að keppa fyrir hvert land um titilinn „Junior Achievement Company of the Year – GEN_E 2026“.

Það er gríðarlega mikilvægt fyrir íslenskt nýsköpunarumhverfi að ungt fólk fái tækifæri til að prófa sig áfram, fá handleiðslu og standa á sviði með hugmyndirnar sínar – bæði heima og á alþjóðlegum vettvangi. Þátttaka Þekktu landið! á GEN_E 2026 er skýr vísbending um styrk og metnað ungra frumkvöðla á Íslandi.

KLAK óskar Þekktu landið! innilega til hamingju

Hjá KLAK – Icelandic Startups erum við stolt af því að sjá svona kröftugt frumkvöðlastarf spretta upp innan framhaldsskólanna. Verkefni eins og Þekktu landið! sýna hvað gerist þegar sköpunarkraftur, frumkvöðlahugsun og góð leiðsögn mætast – og hvernig nýsköpun getur haft bæði fræðslu- og samfélagslegt gildi.

Við óskum Pétru Björk, Thelmu Kristbjörgu, Heru Björt, Tinnu Björg og Hönnu Falksdóttur Krüger, ásamt kennurum og leiðbeinendum þeirra í Verslunarskóla Íslands, innilega til hamingju með árangurinn. Við hlökkum til að fylgjast með ferðalagi Þekktu landið! á GEN_E 2026 og áframhaldandi þróun verkefnisins.

KLAK hvetur jafnframt alla ungt fólk með hugmyndir – stórar sem smáar – til að nýta þau fjölbreyttu úrræði sem í boði eru í nýsköpunarumhverfinu, sækja sér reynslu, þora að prófa sig áfram og læra á leiðinni. Það er einmitt þannig sem næsta kynslóð sprotafyrirtækja verður til.