Þann 17. ágúst héldu KLAK – Icelandic Startups, Rannís, Framvís og Kría sameiginlegan viðburð í stóra salnum í Grósku þar sem spurningunni var velt upp: Skiptir það máli fyrir nýsköpunarumhverfið á Íslandi hvort við göngum í Evrópusambandið?
Markmiðið með viðburðinum var að ræða á einfaldan og aðgengilegan hátt um þau tækifæri og áskoranir sem gætu fylgt hugsanlegri aðild Íslands að Evrópusambandinu, sérstaklega með tilliti til nýsköpunarumhverfisins og sprotafyrirtækja. Umræðan tók á fjölbreyttum þáttum, allt frá regluverki og fjármögnunarumhverfi til alþjóðlegrar samkeppnishæfni íslenskra sprotafyrirtækja.
Til máls tóku sérfræðingar, frumkvöðlar og fjárfestar sem nálguðust viðfangsefnið frá sínum ólíku sjónarhornum:
- Hrönn Greipsdóttir, framkvæmdastjóri Kríu
- Ágúst Ingþórsson, forstöðumaður Rannís
- Hallgrímur Oddsson, stofnandi og framkvæmdastjóri Evrópustrauma
- Ásthildur Otharsdóttir, meðeigandi hjá Frumtaki
- Jökull Sólberg Auðunsson, meðstofnandi TripToJapan.com
- Þorbjörg Helga Vigfúsdóttir, framkvæmdastjóri Kara Connect
- Hjálmar Gíslason, stofnandi og framkvæmdastjóri GRID
Meðal þeirra sjónarmiða sem fram komu:
Um gjaldmiðilinn kom fram að erlendir fjárfestar horfi fyrst og fremst til teymis og hugmyndar frekar en krónunnar sjálfrar, þótt sumir teldu evruna henta sprotafyrirtækjum betur þegar starfsemi vex yfir landamæri.
Varðandi styrktarsjóði var bent á að aðild gæti opnað aðgang að fleiri sjóðum sem Ísland nýtir ekki í dag, þótt kostnaður væri fastur og endurheimt fjármagns breytileg milli ára.
Í umræðu um regluverk kom fram að Ísland fylgi nú þegar að miklu leyti regluverki ESB í gegnum EES og að aðild gæti í sumum tilvikum einfaldað umhverfið með því að draga úr svokallaðri „gullhúðun“ umfram ESB-kröfur. Einnig var nefnt að aðild ætti ekki að hafa teljandi áhrif á aðgengi að Bandaríkjamarkaði eða á íslenskt efnahagslíf vegna hugsanlegra tolla á Kína.
Rætt var um að Evrópa virtist í auknum mæli þétta raðirnar innbyrðis, sem gæti aukið bilið milli ESB og EES til framtíðar, og að staða EES gæti breyst verulega ef Noregur gengi í ESB. Almennt var talið að samningsstaða Íslands væri sterk um þessar mundir.
Bent var á að hugsanlegar aðildarviðræður myndu kalla á aukna forgangsröðun af Íslands hálfu og að upptaka evru ætti að vera forgangsmál stjórnvalda ef til aðildar kæmi.
KLAK stefnir á að halda annan viðburð eftir að niðurstaða liggur fyrir, óháð útkomu, undir yfirskriftinni „Hvað nú?“
KLAK þakkar samstarfsaðilum, frummælendum og gestum kærlega fyrir þátttökuna og hlökkum til áframhaldandi samtals um hvernig íslenskt nýsköpunarumhverfi getur best dafnað til framtíðar.
Íslenska 
English (UK)