Office Hours er viðbótarþjónusta KLAK VMS mentoraþjónustunnar þar sem fyrrum þátttakendur viðskiptahraðla KLAK og Dafna geta bókað 30 mínútna fundi með reyndum sérfræðingum úr hópi mentora eða frá samstarfsaðilum KLAK VMS, sér að kostnaðarlausu. Á fundunum gefst þátttakendum kostur á að fá hagnýt ráð og leiðsögn sem tengist uppbyggingu og rekstri sprotafyrirtækis þeirra. Dæmi um efni eru lagaleg málefni, hugverkaréttur og mannauðsmál.
Þann 23. september 2026, kl. 12:00 – 15:00, munu sérfræðingar frá HØIBERG bjóða upp á Office Hours fundi í Grósku. Fundirnir fara fram á ensku.
HØIBERG er evrópskt hugverkafyrirtæki sem sérhæfir sig í hugverkarétti og veitir ráðgjöf um einkaleyfi og einkaleyfastefnu fyrir fyrirtæki á ólíkum þroskastigum. Evrópsku einkaleyfalögmennirnir Marisa Punzi og Saumey Jain munu hitta frumkvöðla og veita hagnýta ráðgjöf um einkaleyfi, uppbyggingu einkaleyfasafna og stefnumótun á sviði einkaleyfa.
Marisa Punzi er evrópskur einkaleyfalögmaður með sérhæfingu á sviði lífvísinda og víðtæka reynslu af ráðgjöf til frumkvöðla á sviði líftækni, lyfjafræði, matvælatækni, örverufræði og skyldra greina. Hún aðstoðar viðskiptavini við að tryggja og nýta hugverkaréttindi til að styðja við nýsköpun og vöxt fyrirtækja.
Saumey Jain er einkaleyfaráðgjafi með þverfaglegan bakgrunn í líftækni, nanótækni og rafmagnsverkfræði. Hann hefur reynslu af ráðgjöf í fjölbreyttum einkaleyfamálum, meðal annars við gerð og meðferð einkaleyfisumsókna, mat á einkaleyfishæfi, greiningu á athafnafrelsi (freedom-to-operate) og uppfinningum á sviði hugbúnaðar, gervigreindar, heilbrigðistækni, skynjara og háþróaðra efna.
Frumkvöðlar fá tækifæri til að fá hagnýta ráðgjöf um mótun hugverkastefnu, vernd nýsköpunar og helstu atriði sem þarf að hafa í huga varðandi einkaleyfi, þar á meðal einkaleyfishæfi og athafnafrelsi. Fundirnir eru hugsaðir til að hjálpa sprotafyrirtækjum að byggja upp traustan grunn fyrir vöxt, fjárfestingar og markaðssetningu.
Farið verður með öll samtöl sem trúnaðarmál.
Calendly hlekkur: https://calendly.com/klak-icelandicstartups/office-hours-med-hoiberg
Íslenska 
English (UK)