Mentorar KLAK – Venture Mentoring Service sóttu nýverið öflugt tveggja daga námskeið hjá MIT í Boston þar sem áhersla var lögð á áhrif gervigreindar og framtíð vinnumarkaðarins.
Ferðin var liður í samstarfi KLAK við MIT Venture Mentoring Services (MIT VMS), en KLAK VMS byggir á sömu aðferðafræði og MIT hefur þróað til að styðja frumkvöðla með handleiðslu reyndra mentora, án beinna fjárhagslegra hagsmuna. KLAK VMS þjónustan nær árlega til 80 – 100 sprotateyma með stuðningi 180 virkra mentora sem hafa allir hlotið formlega þjálfun í aðferðafræðinni.
Markmið ferðarinnar var að efla færni og þekkingu mentoranna, styrkja tengslanetið og veita innblástur úr einu fremsta nýsköpunarumhverfi heims.
Gervigreind og aðlögun frumkvöðla í hröðum tæknibreytingum
Námskeiðin sem MIT bauð þátttakendum upp á voru fjölbreytt og kraftmikil – eða eins og þau segja sjálf, “eins og að drekka vatnið úr brunahana” – og undirstrikuðu hraðann sem einkennir þekkingarflæði og tæknibreytingar í dag.
Mentorar fengu meðal annars fræðslu frá Melissa Webster lektor við MIT Sloan um hvernig nýta megi spunagreind (generative AI) markvisst í starfi, ásamt innsýn í sveigjanleika fyrirtækja á tímum hraðra breytinga. Þá miðlaði prófessor Scott Stern af dýrmætri reynslu sinni um nýsköpunarumhverfi MIT, sem er einstakt á heimsvísu.
Framsæknar lausnir og alþjóðleg tengslamyndun
Ferðin var einnig einstakt tækifæri til að kynnast MIT DesignX, frumkvöðlahraðlinum sem Svava Grönfeldt hefur stýrt undanfarin ár, og frumkvöðlum með hugmyndir að lausnum á stórum áskorunum sem snerta bæði umhverfi og samfélag. Þá var stoppað í Venture Café Cambridge, lifandi vettvangi þar sem frumkvöðlar og fjárfestar hittast vikulega til að tengjast, læra og þróa hugmyndir áfram.
Heimsóknin undirstrikaði mikilvægi þess að efla alþjóðlegt samstarf, miðla þekkingu og halda áfram að þróa stoðir nýsköpunar á Íslandi.
Hvað er KLAK VMS?
KLAK VMS er mentorakerfi fyrir frumkvöðla, byggt á aðferðafræði MIT Venture Mentoring Service sem þróuð hefur verið í yfir 20 ár við MIT háskólann í Boston. Kerfið byggir á trúnaði, teymisvinnu og því að mentorar séu óháðir hagsmunum, allt í þágu árangurs sprotanna.
Allir mentorar KLAK VMS fá þjálfun frá MIT og starfa samkvæmt alþjóðlega viðurkenndri fyrirmynd. Í dag starfa um 180 sjálfboðaliðar sem mentorar hjá KLAK og styðja árlega um 100 sprotateymi með ráðgjöf og handleiðslu sem skilar skjótum framförum og meiri líkum á árangri.
KLAK VMS er hluti af alþjóðlegu neti 130+ systurprógramma í 29 löndum og hefur reynst öflugur burðarás í íslensku nýsköpunarumhverfi.
Verkefnið er stutt af HR, Rannís, Menningar-, nýsköpunar- og háskólaráðuneytinu, ADVEL og KPMG.
Íslenska 
English (UK) 
