Lokakeppni Gulleggsins 2026 fer fram í Hátíðarsal Grósku næstkomandi fimmtudag, 26. febrúar, klukkan 15:30 – 18:00. Þá stíga tíu metnaðarfull teymi á svið og kynna nýsköpunarhugmyndir sem eiga það sameiginlegt að leita lausna á áskorunum framtíðarinnar, allt frá líftækni og stafrænum lausnum til skemmtunar, umhverfis- og matvælalausna.
Viðburðinn leiðir Steiney Skúladóttir og má búast við bæði fróðlegri og skemmtilegri dagskrá þar sem hugmyndirnar fá að njóta sín á stóra sviðinu. Í lok keppni verður boðið upp á léttar veitingar og drykki, og gefst gestum tækifæri til að spjalla við teymin, dómnefnd og aðra gesti við gróðurvegginn í Grósku.
Lokakeppnin er opin öllum sem hafa áhuga á nýsköpun og frumkvöðlastarfi, hvort sem þú ert sjálf(ur) með hugmynd í maganum, starfar í atvinnulífinu eða vilt einfaldlega fylgjast með næstu hugmyndum Íslands fæðast. Við hvetjum þig eindregið til að mæta, taka þátt í stemningunni og styðja við íslenskt frumkvöðlastarf.
Fyrir þá sem komast ekki á staðinn verður keppnin einnig í beinni útsendingu á Vísir.is.
Hér má sjá nánari umfjöllun um þau tíu teymi sem keppa um Gulleggið 2026: Ljóst er hvaða 10 teymi keppast um Gulleggið 2026!
Íslenska 
English (UK)