Frábær stemning og góð mæting var á vinnustofuna um styrkumsóknaskrif fyrir Tækniþróunarsjóð sem fór fram í Fenjamýri, Grósku, þann 5. febrúar 2025.
Á vinnustofunni fengu þátttakendur dýrmæt ráð um hvernig hægt er að hámarka möguleika sína á að hljóta styrk úr sjóðnum, sem veitir fjármagn til þróunar og nýsköpunar.
Vinnustofan, sem var leidd af Hönnu Kristínu Skaftadóttur, sérfræðingi í nýsköpun, fjármögnun og gervigreind, bauð upp á fræðslu um lykilatriði styrkumsókna.
Farið var yfir algeng mistök, formkröfur og hvernig gervigreind getur nýst við skrif umsókna. Að auki var boðið upp á spurninga- og svarsessjón þar sem þátttakendur gátu fengið persónuleg ráð.
Á meðal þess sem þátttakendur lærðu var hvernig hægt er að skerpa á röksemdarfærslu og efnisvinnslu umsókna, tryggja að þær uppfylli allar kröfur sjóðsins og forðast algeng mistök sem oft reynast dýrkeypt. Vinnustofan endaði á verklegri vinnu þar sem þátttakendur fengu tækifæri til að þróa sínar eigin umsóknir áfram með leiðsögn.
Skilafrestur umsókna í Tækniþróunarsjóð er 17. febrúar kl. 15:00 og ljóst er að þeir sem mættu á vinnustofuna eru vel í stakk búnir til að senda inn vandaðar umsóknir.
Við þökkum öllum sem mættu fyrir þátttökuna og hlökkum til að fylgjast með spennandi nýsköpunarverkefnum sem spretta upp úr þessari vinnu!
Íslenska 
English (UK)