CCEP á Íslandi er nýr bakhjarl Gulleggsins 2024

Coca Cola Europacific Partners á Íslandi er nýr bakhjarl Gulleggsins, stærstu frumkvöðlakeppni Íslands, en Gestur Steinþórsson, markaðsstjóri áfengra drykkja hjá CCEP og Ásta Sóllilja Guðmundsdóttir, framkvæmdastjóri KLAK – Icelandic Startups innsigluðu samstarfið í Grósku á dögunum.    

Gulleggið, sem haldið hefur verið af KLAK – Icelandic Startups í mörg ár, hefur fest sig í sessi sem ein vinsælasta frumkvöðlakeppni á Íslandi og veitt mörgum frumkvöðlum forskot og gott veganesti inn í nýsköpunarumhverfið á Íslandi 

“Við hjá Coca Cola á Íslandi erum stolt af því að fá að styðja við bakið á Gullegginu sem er einstakur vettvangur hér á landi til að ýta undir nýsköpun og hvetja fólk með viðskiptahugmyndir til dáða. Samstarfið fellur vel að samfélagsstefnu okkar þar sem margar af þeim hugmyndum sem berast í Gulleggið geta átt þátt í að auka framþróun í tækni, sjálfbærni og umhverfismálum sem síðar gagnast samfélaginu öllu. Áralöng saga Gulleggsins og þau flottu fyrirtæki og hugmyndir sem hafa komið í gegnum vettvanginn sýnir hversu mikilvægu hlutverki keppnin gegnir. Við hjá Coca-Cola hlökkum því mikið til samstarfsins næstu árin,” segir Anna Regína Björnsdóttir, forstjóri Coca-Cola á Íslandi.

Mörg fyrirtæki hafa farið í gegnum Gulleggið en þar má Controlant, Taktikal, Meniga, PayAnalytics og Atmonia. Allur almenningur er hvattur til að taka fyrstu skrefin í frumkvöðlasamfélaginu og umbreyta hugmynd í viðskiptatækifæri með þátttöku í Gullegginu. 

“Það er mikill styrkur fyrir Gulleggið, stærstu frumkvöðlakeppni Íslands, að hafa fengið jafn öflugan styrktaraðila og Coca Cola Europacific Partners á Íslandi til liðs við okkur. KLAK – Icelandic Startups hefur getað státað sig af því að fá góða og sterka aðila í samstarf við Gulleggið og það er engin breyting á því í ár. Við höfum opnað fyrir skráningu í undirbúningsnámskeið fyrir keppnina og allir frumkvöðlar sem liggja á hugmynd eru hvattir til að skrá sig,” segir Ásta Sóllilja Guðmundsdóttir, framkvæmdastjóri KLAK – Icelandic Startups. 

Á mynd frá vinstri: Magnús Daði Eyjólfsson verkefnastjóri Gulleggsins, Anna Regína Björnsdóttir, forstjóri Coca-Cola á Íslandi, Ásta Sóllilja Guðmundsdóttir framkvæmdastjóri KLAK – Icelandic Startups og Gestur Steinþórsson, markaðsstjóri áfengra drykkja hjá CCEP. 

Viðskiptablaðið 31.10.2023