Kolfinna Kristínardóttir, verkefnastjóri Startup Tourism, Ásta Kristín Sigurjónsdóttir, framkvæmdastjóri Ferðaklasans, Sigríður Dögg Guðmundsdóttir forstöðumaður útflutnings og fjárfestinga hjá Íslandsstofu, Arndís Anna Reynisdóttir, sölu og markaðsstjóri Berjaya Iceland Hotels, Jón Viðar Stefánsson forstöðumaður verslunarsviðs N1, Lilja Alfreðsdóttir ferðamálaráðherra, Ásta Guðmundsdóttir framkvæmdastjóri ferðasviðs Icelandia, Gísli S. Brynjólfsson, markaðsstjóri Icelandair og Ásta Sóllilja Guðmundsdóttir, framkvæmdastjóri KLAK – Icelandic Startups.
Eftir fimm ára hlé hafa KLAK – Icelandic Startups og Ferðaklasinn í samstarfi við öfluga bakhjarla ákveðið að endurvekja Startup Tourism, viðskiptahraðal fyrir frumkvöðla í ferðaþjónustu. Með því að endurvekja hraðalinn vonast samstarfsaðilar til að skapa ný tækifæri innan íslenskrar ferðaþjónustu.
Bakhjarlar hraðalsins komu saman í Grósku í dag til að undirrita samstarfssamning um hraðalinn en styrktaraðilar hraðalsins eru Menningar- og viðskiptaráðuneytið, Berjaya Iceland Hotels, Icelandair, N1 og Icelandia, auk þess sem Íslandsstofa kemur að verkefninu sem samstarfsaðili.
Lilja Alfreðsdóttir, ferðamálaráðherra, leggur áherslu á mikilvægi ferðaþjónustunnar fyrir íslenskt hagkerfi.: „Í nýrri ferðamálastefnu og aðgerðaáætlun til 2030 er lögð áhersla á öfluga nýsköpun og vöruþróun. Það er mikil gróska og hugmyndaauðgi í íslenskri ferðaþjónustu, allt frá snjöllum tæknilausnum til fjölbreyttrar afþreyingar og nýrrar upplifunar. Með þátttöku í Startup Tourism fá aðilar stuðning og hvatningu til að koma slíkum verkefnum af stað hratt og örugglega.”
Hraðallinn, sem var keyrður fjórum sinnum á árunum 2016-2019, skilaði frábærum árangri fyrir íslenska ferðaþjónustu en 15 af þeim 39 sprotafyrirtækjum sem tóku þátt eru enn starfandi í dag.
Ásta Sóllilja Guðmundsdóttir, framkvæmdastjóri KLAK, lýsir yfir ánægju með endurkomu hraðalsins: „Við erum afar stolt af því að sjá Startup Tourism vakna af dvala og árangurinn talar sínu máli. Við erum viss um að með nýsköpun sé hægt að auka samkeppnishæfni Íslands sem áfangastaðar enn frekar”.
Markmið verkefnisins er að hvetja til nýsköpunar og tæknivæðingar í greininni, styrkja stoðir nýrra fyrirtækja, fjölga afþreyingarmöguleikum og stuðla að dreifingu ferðamanna víðsvegar um landið, allan ársins hring og áhersla er lögð á að auðvelda fyrirtækjum af landsbyggðinni að taka þátt.
Ásta Kristín Sigurjónsdóttir, framkvæmdastjóri Ferðaklasans, bætti við: „Ferðaþjónusta er stærsta útflutningsgrein þjóðarinnar og með henni koma mikilvægar gjaldeyristekjur. Áskorunin okkar er að verðmætasköpun í greininni verði alltaf sem mest og hún skilji eftir sig sem mest virði án þess að ganga á viðkvæma náttúru eða að upplifun íbúa verði neikvæð. Startup Tourism er eitt besta verkfærið sem við eigum í skúffunni til þess að hraða okkur í átt að þessum mikilvægu breytingum”. Verkefnið markar tímamót í nýsköpun innan ferðaþjónustunnar. Allt að tíu teymum mun bjóðast sæti í fimm vikna hraðli sem hefst þann 28. október og lýkur með fjárfestadegi þann 27. nóvember en opnað var fyrir umsóknir í dag.